Со изложба на дела од средношколците заврши проектот „Стоп за говорот на омраза“ во Гостивар

Средношколците од гостиварските училишта, преку уметноста го кренаа својот глас против говорот на омраза. Во средното економско училиште во Гостивар, денес беа изложени дела создадени од учениците, на тема „Стоп за говорот на омраза“, со која се заокружи истоимениот проект на Отсекот за превенција на Секторот за внатрешни работи Тетово, ОБСЕ и локалната самоуправа.

„Целта на проектот беше младите да се зближат, да ги надминат предрасудите, да се дружат, при тоа почитувајќи ги основните начела на заштитените карактеристики на поединци или група на луѓе, како што се верската , националната, расната припадност“, рече Илија Ѓурчиноски, инспектор во Отсекот за превенција на СВР Тетово

Претставникот на ОБСЕ,  Ѓулас Сефери, истакна дека превенцијата на говор на омраза е многу важна, затоа што ако не се спречи навреме, може да премине во насилство. „Еден од ефикасните начини на спречување на оваа појава е преку подигнување на свеста кај младите преку информирање, а токму кон тоа се стремиме преку овој проект“, рече Сефери.

На изложбата беа избрани десетина најуспешни слики, за кои на авторите им беа доделени пригодни награди и признанија.

„Учениците на најдобар можен начин покажаа како да се стави крај на говорот на омраза. Како локална самоуправа секогаш ќе ги поддржуваме ваквите проекти и иницијативи“, рече во своето обраќање Аслијан Снопче од општинскиот сектор за образование.

Проектот „Стоп за говорот на омраза“ стартуваше на почетокот на декември годинава и со него вкупно беа опфатени над 2.500 ученици во прва година од шестте тетовски и четирите гостиварски средни училишта. Преку обуки и креативни работилници тие се  информираа како да го препознаат говорот на омраза, како да се воздржат од истиот и кои можат да бидат личните и општествено негативните последици.