Собир во Маврово во спомен на загинатите во снежната трагедија од 1956 година

Пред споменикот на градителите во Маврово утрово се одбележаа 67 години од февруарската трагедија, кога големи снежни лавини однесоа 52 човечки животи. Настанот традиционално го организираше ХЕС „Маврово“, со цел да се оддаде почит на загинатите.

„Ви благодарам на сите што издвоивте време и простор да дојдеме денес и да ја одбележиме годишнината. Посебно значајно, особено за нас вработените во ХЕС Маврово е да се собереме за да одадеме почит на загинатите градители. Во сабота се навршија 67 години од февруарската трагедија, кога од снежните лавини што го зафатија мавровскиот регион загинаа 52 градители на системот, граничари и мештани. Во знак на сеќавање на трагедијата што ги потресе жителите на целата тогашна Југославија, бидејќи градители имаше од сите делови на земјата, подигнат е овој споменик и традиционално се одржува Мавровскиот Меморијал. Со ова одбележување, сакаме да им дадеме до знаење на сите наши вработени и на помладите генерации, дека луѓето што загинаа во оваа трагедија вечно не‘ задолжија, положувајќи ги своите животи“, рече Ѓорѓи Божиновски, директор на ХЕС „Маврово“.

Со едноминутно молчење присутните оддадоа почит кон оние кои ги загубиле своите животи во трагедијата во периодот на изградбата на хидроенергетскиот систем.

Букети цвеќе на споменикот, положија делегации на ХЕС „Маврово“, Националниот парк Маврово, Општина Маврово и Ростуше, Здружението на акцијаши од Гостивар и Здружението на планинари „Бистра“.

Февруарската снежна трагедија е една од најголемите предизвикани од временска непогода на нашето подрачје. Се случила во околината на селата Рибница, Торбешки мост и Стрезимир. Од стотина луѓе, колку што биле затрупани со лавините, спасувачките екипи успеале да извлечат половина до нив.

Споменикот на градителите е подигнат во 1970 година, а ја симболизира нивната храброст и пожртвуваност. Изминатиот период ХЕС Маврово изврши одредени интервенции за обнова и санација на плочите на спомен обележјето на кои се испишани имињата на жртвите во трагедијата.