Социјалните станови остануваат сопственост на државата, семејствата ќе бидат само корисници

Социјалните станови во Гостивар, за кои на почетокот од месецов беше објавен оглас за распределба, ќе останат во сопственост на државата, а семејствата што ќе ги добијат ќе бидат само корисници.

После пет години институциите ќе извршат контрола и доколку семејството излегло од социјален ризик, станот ќе биде доделен на друго ранливо семејство. Тоа се прави со цел да се згрижат оние кои реално имаат потреба и да спречат обиди за манипулација, односно препродажба на становите.

„Станот останува во сопственост на државата, а граѓаните, семејствата што ќе ги добијат ќе бидат корисници. Тоа ќе се регулира со договор од 5 години. По истекување на тој временски период документите треба да се ревидираат, да се види дали на семејствата што ги добиле тие станови им е променет социјалниот статус. Ако институциите утврдат дека има промени, односно дека веќе не се во социјален ризик, станот ќе се одземе од семејството и ќе се додели на друго семејство, кое е во социјален ризик. Значи нема да има промена на сопственоста, нема да биде можно да се прави купопродажба на становите“, појаснува Азби Шаќири, директор на Центарот за социјална работа во Гостивар.

Како што веќе објави Gostivarpress.mk за социјалните станови во Гостивар, има огромен интерес. Во првите пет дена од објавување на огласот беа поднесени 300 апликации, а на располагање се вкупно 70 станови.

Според критериумите може да аплицираат: деца над 18 години без родители или родителска грижа односно кои до својата 18 година биле згрижени во институции, корисници на гарантирана минимална помош, граѓани погодени од елементарни – природни непогоди, семејства со лица со попреченост, социјално загрозени припадници на Ромската заедница како и самохрани родители со малолетни деца.