Солена торта со пиво и крекери – мезе за мерак

На летните горештини, секако дека годи чаша ладно пиво. Се знае дека пивото се користи при подготовка на некои врсти на јадења со месо, но исто така може да се додава и во други специјалитети. Ние ви предлагаме да ја пробате солената торта со пиво и крекери, која одлично оди како мезе…со чашка пиво, се разбира.

Состојки за тесто:

200 мл.пиво

200 мл. кисела вода

16 лажици брашно

8 лажици ајвар

прашок за пециво

Сол

За фил:

2 варени компири

6 кисели краставички

200 мл. мајонез

200 гр. сирење

100 гр. крекери

Подготовка на тесто: Најпрво убаво се мешаат пивото и киселата вода, а потоа им се додаваат сите други состојки за тестото и повторно се мешаат. Кога ќе се изедначи смесата се става да се пече во плех обложен со хартија за печење, на 200 степени околу 20 минути.

Подготовка на фил: краставичките ситно се сецкаат, компирите се гмечат, сирењето се ренда и сите состојки убаво се мешаат, по што им се додава мајонезот.

Постапка за редење на тортата:Испеченото тесто се остава да се излади, а потоа се сече на половина. Врз првата половина најпрво се премачкува фил, а потоа се редат крекерите. Врз крекерите се мачка втор слој фил и врз него се става втората половина од тестото. Вака подготвената солена торта се остава неколку часа во фрижидер да се стегне. Потоа, може да ја декорирате по желба, со рендан кашкавал, маслинки, зелена салата, мајонез, павлака…