Сообраќајка во Гостивар: Мерцедес удрил во жена

Триесет и пет годишна жителка на Тетово завршила со скршеница на рамото во сообраќајна несреќа која се случила доцна попладне во Гостивар.

Според информациите од портпаролот на СВР Тетово, Марјан Јосифоски несреќата е регистрирана околу 18 часот и 30 минути на булеварот „Гоце Делчев“. Автомобил „мерцедес“ со гостиварска регистрација, што го управувал 71 годишниот Т.А удрил во 35 годишната Ѓ.Е од Тетово, која се движела како пешак. Од ударот жената се здобила со скршеница на клучна коска на рамото, била пренесена во гостиварската болница од каде по укажаната лекарска помош, префрлена е на клиниките во Скопје.

Екипи на полицијата со овластување на Јавен обвинител вршат увид на местото на настанот. Причините и околностите за несреќата ќе се утврдуваат.