Сообраќајки во гостиварско предизвикани од кучиња, мечка, срна

Сообраќајните несреќи на патиштата во поширокиот гостиварски регион, предизвикани од животни не се нова појава. Клучката кај Неготино-Полошко,  магистралниот пат Гостивар-Кичево и регионалниот пат кон Маврово и Дебар се најчестите места кадешто се случуваат ваков вид на несреќи.

Податоците од Секторот за внатрешни работи покажуваат дека во првата половина од годинава, на гостиварското подрачје регистрирани се вкупно девет сообраќајни несреќи со животни и тоа со кучиња, мечки и една со срна. Сообраќајките на автопатот се последица на оштетената заштитна ограда на повеќе места, која и натаму е или докрај нефункционална или воопшто ја нема, оценуваат од полицијата. Најголемиот број од несреќите завршиле со усмртување на животните, кои неконтролирано се движеле по коловозот, а без повредени возачи или сопатници. Според полициските анализи, најчесто време на случување се доцните вечерни и раните утрински часови.

Минатата година на целото тетовско-гостиварско подрачје бројот на сообраќајните несреќи поради необезбедени услoви на пат изнесувал 118, од кои најголемиот дел се сообраќајки во кои непосредни учесници или предизвикувачи биле животни – кучиња, зајци, мечка, коњи и друго.