Сообраќајот во зимски услови, препорачано внимателно возење

Забраните за сообраќај за тешки товарни возила на патните правци Гостивар – крак Маврово – Дебар и на патниот правец Гостивар – Стража од утринава се укинати.

Од Авто мото сојузот на Македонија информираат дека сообраќајот на државните патишта се одвива во зимски услови, по наместа влажни коловози. Снег врне на Попова-Шапка кој во моментот не се задржува на коловозот.

Оттаму потсетуваат дека од вчера во целосен прекин е сообраќај во близина на Башино Село, кај мостот и тој ќе биде во прекин подолг временски период.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.