Состанок на ХДЗР „Месечина“ Гостивар и МВР за проблемите на лицата без лични документи

Предизвиците и проблемите со кои се соочуваат лицата кои не се евидентирани во матичната книга на родени, беше главна тема на состанокот меѓу претставници на Хуманитарното здружение на Ромите “Месечина“ од Гостивар и МВР.

Најмалку 750 лица не се евидентирани во матичната книга на родени, поради што имаат тешкотии во остварување на свои права во образование, здравство, вработување, социјални бенифиции.

На состанокот е утврдено дека  МВР ќе го стави на располагање својот човеков и материјален капацитет во секој град и на секое место каде ќе се укаже потреба од помош и законска обврска на МВР во работа со лицата неевидентирани во матичната книга на родени.

„Ја цениме помошта и спремноста на граѓанските организации кои се нудат со сопствените ресурси да ги упатуваат лицата неевидентирани во матичната книга на родени во органите на МВР надлежни за издавањето на соодветната идентификациона исправа на лице запишано во посебната матична книга на родени. Согласно членот 10 точка 6 од Законот за неевидентирани лица во матичната книга на родени, Министерството за внатрешни работи, членовите 2 точка 2 и членот 5 од Правилник за формата, содржината и начинот на издавање на Идентификациона исправа за фомата и содржината на Барањето за издавање идентификациона исправа на лице запишано во посебната матична книга на роден, МВР ги има на располагање, испечатено: Барањата за издавање идентификациона исправа на лице запишано во посебната матична книга на родени и Идентификациона исправа. Заедно ги повикуваме лицата кои имаат проблем со пријавувањето на раѓањето да го искористат правото кој им го нуди Законот за неевидентирани лица во матичната книга на родени.“, изјави министерот за внатрешни работи Агим Нухиу.