Совети и потсетување на правилата за моторџиите и велосипедистите во Гостивар и Тетово

Викендов на подрачјето на СВР Тетово беa спроведени превентивно-едукативни активности, односно кампања под мотото „Јас внимавам и безбедно возам”. На неколку пунктови во Тетово и Гостивар, на велосипедисти, мотоциклисти и возачи на електрични тротинети, полициски службеници им делеа летоци изработени на македонски и албански јазик, како и маички со едукативни информации и совети за нивно безбедно учество во сообраќајот.

Во рамки на активностите, иницирани и координирани од Отсекот за превенција, оваа категорија учесници во сообраќајот поблиску беа запознати со потребата од внимателно и безбедно возење, за користење заштитна кацига и за доследно почитување на сите правила и прописи.

„На мотоциклистите посебно им беше укажано да ја прилагодуваат брзината, да не консумираат алкохол и секогаш да им даваат предност на пешаците, но и навреме да ги регистрираат мотоциклите, да не седнуваат зад управувачот без положен возачки испит и валидна возачка дозвола, меѓутоа и да обрнат внимание на бучавоста.“, информира полицијата.

Овие активности се очекува да придонесат за поголема безбедност на патиштата и во Полошкиот регион, каде деновиве значително е зголемен бројот на велосипедисти, мотоциклисти и возачи на електрични тротинети.