Советот на Гостивар усвои Стратегија за поддршка на мали и средни фирми: Грантови, инкубатор за бизниси, саеми…

Со посебни мерки и активности Општина Гостивар планира да ги поддржи малите и средни претпријатија на своја територија и да го поттикнува претприемништвото. Тие се предвидени во Стратегија за 2025-та година, која беше усвоена на денешната седница на општинскиот Совет.

„Преку оваа Стратегија имаме за цел поддршка на бизнис секторот, поттикнување на развојот на малите и средни претпријатија, развој на туризмот, подобрување на инфраструктурата и другите услови за трговија, заштита на потрошувачите. Планирано е организирање обуки, форуми, саеми, културни фестивали, доделување грантови, отворање инкубатор за бизнис, поддршка на угостителски објекти, земјоделството и занаетчиството.“, нагласи Мерсел Незири од локалната самоуправа.

Од опозициската ДУИ стигнаа забелешки за Стратегијата.

„Стратегијата ви е на три листа, да сте го прашале ChatGPT ќе излегло подобро. Би било добро содржината да е поквалитетно изработена. Ако ние како Совет не произведеме нешто квалитетно, што да очекуваме од другите. Стратегијата е за мали и средни претпријатија, а во Гостивар има само 2 претпријатија кои ги исполнуваат нормите на Стопанска комора да спаѓаат во средни, односно имаат до 250 вработени. Повеќето се микро претпријатија кои имаат до 10 работници и дел меѓу мирко и мали од 10 до 50. Странските инвеститори треба да знаат дека во нашиот град економијата се базира на микро и мали претпријатија“, рече меѓу другото во своето излагање советникот од ДУИ, Лек Далипи.

Советничката Себаете Зенку од истата партија забележа дека Стратегијата повеќе личи на желби, отколку на реалност. Според неа наместо земјоделство, како што стои во документот, треба да се наведе сточарството со образложение дека Гостивар повеќе има услови за развој на сточарство. На тоа, претседателот на Советот, Намик Дурмиши рече дека под „земјоделие“ се мисли и на сточарството и дека и тоа ќе биде опфатено.

На седницата беа усвоени и повеќе одлуки врзани со работата и функционирањето на градинките во Гостивар, како и точки од урбанизмот.