СП 2018: Последни осминафинални натпревари: Шведска-Швајцарија и Колумбија-Англија

Завршува осминафиналната фаза на Мундијалот во Русија. Денеска ќе ги дознаеме последните патници во четвртфиналето. Вчерашниот ден беше среќен за селекциите на Бразил и Белгија кои се веќе меѓу осумте најдобри.

Силен впечаток остави селекцијата на Јапонија, го играше можеби најубавиот фудбал на ова првенство, а нивните навивачи кои после секој натпревар го чистеа секторот од трибините во кои се наоѓа го воодушевија светот. Дека културата е на високо ниво, потврдија и фудбалерите на Јапонија. После вчерашното испаѓање и  пораз во последните секунди од натпреварот, од јапонскиот табор си ја исчистија својата соблекувална и напишаа „Благодариме“ на руски јазик.

Денска на програмата се последните осминафиналните пресметки. Се среќаваат Шведска – Швајцарија и Колумбија – Англија.

Од 16 часот во Санкт Петербург, на истоимената арена ќе играат селекциите на Шведска и Швајцарија. Швеѓаните до овој натпревар стигнаа со победите над Мексико и Јужна Кореја. Додека Швајцарија одигра нерешено со Бразил и Костарика и ја совлада Србија.

Англичаните свесно ја избраа селекцијата на Колумбија за противник во оваа фаза, несакајќи да постигнат гол на натпреварот со Белгија и го зазедоа второто место сметајќи дека Колумбија им е противник по мерка. Дали англичаните ги потценија колумбиците или навистина биле во право ќе знаеме после вечерашниот натпревар. Дуелот започнува во 20 часот, ќе се игра во Москва на Откритие стадионот.