СП 2019: Македонија-Хрватска денеска од 18 часот

После победите со Јапонија во првото коло и вчера против Бахренин, нашата ракометна селекција со едната нога веќе се наоѓа во Келн каде ќе се игра вториот круг од 26-тото Светско првенство во ракомет. За потврда на тој успех на избраниците на Раул Гонзалес потребна им е само уште една победа од наредните три натпревари. Но, дури сега почнува вистинскиот Мундијал на селекцијата на Македонија.

Денеска од 18 часот, во рамки на третото коло во групата Б, репрезентацијата на Македонија ќе се сретне со Хрватска.

„Ел команданте“ храбро изјави дека овој тим може да се носи со селекцијата на Хрватска.

„Знаете се за Хрватска, тоа е репрезентација што ги има најдобрите ракометари во светот и што сигурно ќе се бори за медал на овој шампионат. Ние ги почитуваме, но сигурно ќе бараме своја шанса. Според мене, за да можеме да се носиме со Хрватска ќе треба да играме напад како против Јапонија и одбрана како против Бахреин. Тоа е она кон што ќе се стремиме на денешниот натпревар“, изјави предводникот на нашиот најдобар национален тим за Sportmedia.

Во меѓусебните дуели нашиот тим има само една победа против „коцкастите“ и тоа пред 22 години. Во групата Б има три екипи со по 4 бодови, расплетот ќе започне после вечерашните дуели од оваа група.