СП 2019: Натпреварот со Исланд „да се биде или не“ за нашата селекција

Репрезентацијата на Македонија денеска против Исланд го игра натпреварот „да се биде или не“.

После вчерашниот пораз од европскиот првак Шпанија, јасни се калкулациите на нашата селекција ако сака да се најде во вториот круг. Победа и само победа ја носи Македонија во топ 12 најдобри светски селекции на 26-тиот ракометен Мундијал.

Репрезентацијата на Исланд, после првите два порази од Хрватска и Шпанија, се врати во игра со победите над Јапонија и Бахрин и има исто бодови колку и Македонија, но со подобра гол разлика која ќе биде пресудна ако на крајот имаме ист број на бодови.

Нашата селекција иако може да го заврши натпреварувањето денеска, по многу го игра најдобриот офанзивен ракомет откако учествуваме на големите натпревараувања. Динамичен, агресивен, брз, со многу трчање модерен ракомет, без тешкотии и мачење во нападот. Гонзалез, кој против Шпанија не изгледаше ништо подобро од нашите досегашни селектори, со сигурност нема да се откаже од шансата која му е пружена, Македонија под негово водство да се најде помеѓу најдобрите 12 селекции на светот.

Исланд не е непознат противник на нашата репрезентација, низ минатото имаме одиграно 15 натпревари од кои само 3 се победи на Македонија.

Победата против Исланд ќе значи влез во вториот круг и три нови натпревари, според состојбата во останатите групи најверојатно против Франција, Германија и Бразил.

Дуелот со Исланд започнува од 18 часот.