СП Франција: Македонија – Тунис 17:45 часот

Од 17.45 часот во Мец стартува новото мундијалско шоу за Македонија, а првиот ривал е селекцијата на Тунис, против која имаме негативни бројки од минатото

Македонија тргнува против истиот противник со кој почна и во 2009 година на Мундијалот во Хрватска. Светското првенство во Франција е најава за една „нова“ Македонија или барем некои сакаат така да ја нарекуваат сениорската ракометна селекција. Промени во играчкиот кадар се веќе направени, а Лино Червар најави дека ќе има промени и во играта. Не сакаше да открива, а не откри ништо и на единствениот отворен меч против БиХ одигран на 3 јануари во Скопје. Сепак, не е тајна дека „Стариот лисец“ има џокер во ракавот кој ќе го „фрли“ на теренот тогаш кога ќе му биде потребно.

Целта е да се освои едно од првите четири места што водат во осмина-финалето, а овие момци можат да го направат тоа. На секое првенство од 2009 година наваму успеваа да ја минат групата, па зошто да не биде така и сега кога младоста и искуството треба да дојдат до експлозија.