Спасовски преку времено отворениот граничен премин Стрезимир во посета на косовска Рестелица

Граничниот премин Стрезимир на македонско–косовската граница од вчера е времено отворен за преминување со лична карта или пасош. Министерот за внатрешни работи на Македонија, Оливер Спасовски денес го помина граничниот премин и беше во посета на селото Рестелица, општина Драгаш, во регионот на Гора.

„Заедничката посета на општината Драгаш во Косово, каде живеат наши луѓе заедно со граѓани од општина Маврово – Ростуше, што ја организиравме со градоначалникот Медат Куртовски е многу значајна активност. Ваквите пријателски посети и средби со граѓаните на нашите две држави отвораат нови можности и коридори за комуникација во новите следни предизвици, а се со цел подобрени услови за жителите во овие околни места и подобра иднина“, изјави Спасовски, кој при посетата се сретна со косовскиот министер за внатрешни работи Бејтуш Гаши и директорот на полицијата на Косово, Наим Реџа.

„Ние како општина ќе продолжиме со активно лобирање за трајно отворање на овој граничен премин како и обезбедување на нормални услови, односно асфалтирање на овој правец.“, рече градоначалникот на Маврово Ростуше, Медат Куртовски.

Преминот „Стрезимир“ кон Косово е времено отворен од 18 до 20 август.