Според ДЗС во Гостивар лани се изградени 13 дивоградби

На подрачјето на Општина Гостивар, минатата година биле изградени вкупно 13 дивоградби, од кои девет се објекти за домување, една гаража и три огради. Податоците се содржат во соопштението кое го објави Државниот завод за статистика, за бесправно изградени градби во 2018-та година. Споредено со претходната, 2017-та, бројката на дивоградби се зголемила за пет.
Гледано по општини, најмногу диви градби има во Скопје (226), Куманово (78), Штип (70), Липково (68), Струмица (56), Охрид (50) итн.
Во Врапчиште лани регистрирани се 6 бесправни градби, сите објекти за домување, додека во Маврово и Ростуше вкупно 4, од кои еден објект за домување, една гаража и 2 огради.
Според податоците на Државниот завод за статистика, во текот на 2018 година, во земјава се регистрирани вкупно 955 бесправно изградени објекти.
Според видот на објектот, бесправно се изградени 249 објекти за домување (26.1 %), 133 доградби, надградби и адаптации (13.9 %), 113 деловни објекти (11.9 %), 78 гаражи (8.2 %), 134 огради (14.0 %), 6 скалила (0.6 %), 15 тераси (1.6 %), 28 летни тераси (2.9 %), 95 настрешници (9.9 %), 13 времени објекти (1.4 %) и 91 помошен објект (9.5 %).
Најголем број бесправно изградени објекти (98.1 %) се во приватна сопственост.