Спортски активности во чест на 1.000 години Бигорски Манастир

Во пресрет на одбележувањето на големиот јубилеј – 1000 години од основањето на Бигорскиот манастир група спортисти, ги посветија своите спортски подвизи токму на овој значаен настан.

Членови на спортско-качувачките клубови од нашата земја (Екстрем и Карпош од Скопје, Вертикал од Битола, Астибо од Штип и Карпи за секој од Демир Капија), членови на Спортско качувачката федерација, под раководство на претседателот Владимир Трповски, се искачуваа по атрактивните и светски познати насоки во Мавровската пештера.

Како што информираат од Бигорски, претходно во четвртокот, од граничниот премин Стрезимир, тројцата искусни планинари и алпинисти: Марио Шаревски, Маја Бошкоска и Војкан Недковски, за првпат во историјата на македонското планинарење поминаа трансверзала по планинскиот венец Кораб-Дешат-Крчин од 70 километри.

„Посебно беше задоволството овие храбри атлети во текот на спортувањето да ги носат јубилејните маици на Бигорскиот манастир, во знак на поддршка и нескриена радост за големината и значењето на 1000-годишнината од основањето на Бигорската Обител. На крај, тие го посетија древното Бигорско светилиште и се поклонија пред чудотворната икона на светиот Јован Крстител, а нешто подоцна сите беа поздравени од нашиот возљубен Старец, архимандрит Партениј, кој со особена љубов, задоволство и восхит за нивниот спортски подвиг во чест на Јубилејот, од срце им се заблагодари и ги благослови за нови успешни духовно-телесни искачувања и спортски достигнувања.“, соопштија од Бигорскиот Манастир.

фото:Бигорски манастир