Këshilltarët e Komunës së Gostivarit kërkuan që të marrin materiale më të detajuara për të zhvilluar diskutime më të mira

Financa, arsimi, urbanizmi, puna e NP “Komunalec” ishin fushat në të cilat u referuan pikat e shqyrtuara nga Këshilli i Komunës së Gostivarit në seancën e sotme, e shtata me radhë e përbërjes së re.

Këshilltarët votuan vendimin në bazë të të cilit Komuna e Gostivarit merr përsipër të paguajë energjinë elektrike për pompat e ujit në fshatrat Çegran dhe Forinë. Siç u shpjegua, ky hap është në drejtim që banorët të mos mbeten pa ujë. Menaxhmenti i rrjetit të ujësjellësit në këto fshatra duhet të kalojë në “Komunalec” të Gostivarit, duke qenë se kompania “Pastërtia” nuk është aktive për një kohë të gjatë.

Në seancë u miratuan edhe planet vjetore të punësimit për vitin 2023 të shkollave: “Bashkimi” dhe “Ismail Qemali” në qytet dhe “Përparimi” në Çegran. Lidhur me Komunalecin janë miratuar: pëlqimi për Vendimin për përcaktimin e vlerës së pikës për llogaritjen e pagave të punëtorëve në kompani, llogaria përfundimtare dhe raporti financiar për vitin 2021 dhe çmimi i shërbimeve ndërtimore nga JP Komunalec.

Disa nga këshilltarët në fjalimet e tyre theksuan se me rastin e shpalljes së seancave duhet të dorëzohen materiale më të detajuara për pikat e rendit të ditës, përkatësisht raporte, programe, plane në mënyrë që të mund t’i shqyrtojnë dhe të zhvillojnë diskutime të bazuara në fakte. “Debati i ka shtuar vlerën demokracisë parlamentare”, tha kryetari i Këshillit Valbon Limani, duke i kërkuar administratës që të sigurojë të gjitha materialet e nevojshme për këshilltarët.

Këshilli sot ka marrë vendim edhe për ndarjen e mjeteve për Shoqatën e qytetarëve “Integrimi i romëve” për organizimin e shënimit të Ditës së Romëve në Gostivar.