Info sesion në Gostivar: Kush dhe si mund të marrë para nga buxheti për projekte?

Qytetarët, organizatat joqeveritare dhe klubet sportive patën mundësinë të njihen më  detajisht me kushtet dhe mënyrën e aplikimit në thirrjen publike e publikuar nga Komuna e Gostivarit, e cila ka të bëjë me mbështetjen financiare për realizimin e projekteve në vitin aktual.  Në seancën informative të mbajtur dje në sallën e komunës para të interesuarve për të përfituar nga kjo mundësi folën përfaqsues të komunës.

„Qytetarët e interesuar, organizatat joqeveritare dhe klubet sportive që kanë aktivitete projekti me ndikim pozitiv në ngritjen dhe zhvillimin e kulturës, sportit, mjedisit jetësor, mbrojtjes sociale dhe mundësive të barabarta, mund të aplikojnë për thirrjen publike deri më 15 shkurt. Aktivitetet e shoqatave/klubeve do të mbështeten në shumën minimale prej 30.000 deri në maksimum 180.000 denarë, ndërsa aktivitetet e personave fizikë do të mbështeten në vlerë minimale prej 10.000 deri në shumën maksimale prej 30.000 denarë për projekt”, u tha në sesionin informativ.

Aplikacionet e dorëzuara do të vlerësohen sipas kritereve të parashikuara në thirrjen publike, ndërsa rezultatet do të publikohen në ueb faqen e komunës.