KB Gostivar e mirëpret ekipin e Akademisë FMP (ora 19)

Pas një pauze dy javore për shkak të detyrimeve reprezentative, vazhdojnë emocionet në kampionatin e Maqedonisë në basketboll. Në kuadër të xhiros së 9-të, basketbollistet e Gostivarit do të presin skuadrën e Naviko-Akademia FMP.

Skuadra nga Kisela Voda hyn në këtë duel pas vizitës në Izrael ku humbi dy ndeshjet e ligës së BIBL nga skuadrat e Galil Ejlon dhe Makabi Haifa. Në kampionatin vendas, skuadra e trajnerit Petroviq ka 5 fitore dhe 3 humbje, mposhtën Kozuvin, Euronikelin, Kumanovën, MZT 2 dhe Angelin, humbën nga Feniks, Pelister dhe Rabotniçki. Stefan Krstajiç ka qenë individi më i mirë në FMP për dy sezone dhe një nga lojtarët më efikas në ligë.

KB Gostivar, pas disa fatkeqësive me lojtarë të lënduar, më në fund do ta mirëpresë ekipin e FMP-së. Gostivari ka të njëjtin rezultat me mysafirët 5 fitore dhe 3 humbje, por fakti që “bardheblutë” janë të pathyeshëm në shtëpi, i nxjerr si favorit në këtë duel. E në llogaritjet e ndërsjella statistikat janë në anën e nikoqirëve, Gostivari ka 3, Akademia FMP një fitore.

Ndeshja luhet nga ora 19:00.