Zjarret në rrugën “29 Nëntori” në Gostivar: Në zbardhjen e rasteve janë përfshirë ekspertë nga Shkupi

Tre zjarre kanë ndodhur në ndërtesa të vjetra të pabanuara për më pak se një javë në të njëjtën rrugë në Gostivar – rrugicë në qendër të qytetit. Të tre në orët e mbrëmjes, të lokalizuara nga zjarrfikësit me ndërhyrje të shpejtë, pa të lënduar apo viktima, por me dyshime të ngritura nga publiku: A ka lidhje, cili është shkaku i zjarreve, nëse janë vënë me qëllim, etj.

Tre zjarret shënohen në raportet zyrtare të institucioneve. Nga atje për momentin nuk ka përgjigje më konkrete për pyetjet e përmendura, por policia njofton se në masat e ndërmarra janë përfshirë edhe ekspertë nga Shkupi.

“Në tre zjarre që janë regjistruar vitin e kaluar dhe këtë javë në të njëjtin numër, kryesisht objekte të vjetra në rrugën “29 Nëntori” në Gostivar, nuk ka të lënduar, por janë shkaktuar vetëm dëme materiale, sasia e të cilave ende është duke u përcaktuar. Në koordinim me Prokurorin Publik, i cili ka qenë i përfshirë në këto raste që nga fillimi, janë duke u përcaktuar edhe shkaqet e zjarreve. Sektori për Punë të Brendshme Tetovë – Departamenti për Punë të Brendshme Gostivar po ndërmerr disa masa operative për zbardhjen e shkaqeve dhe autorëve të mundshëm. Masat do të vazhdojnë edhe në ditët në vijim, ndërsa në zbatimin e tyre aktivisht janë përfshirë ekipe profesionale (ekspertë) nga MPB-ja nga Shkupi.” thuhet në përgjigjen që Gostivarppress.mk e ka marrë nga SPB Tetovë në një pyetje lidhur me zjarret.

Zjarri i parë është regjistruar më 9 prill, i dyti më 11 prill dhe i fundit mbrëmë (13 prill).