Србија во финалето на светскиот шампионат во кошарка

Кошаркарската репрезентација на Србија се пласираше во финалето на Светското првенство, откако денеска во Манила ја совлада Канада со 95:86 (23:15, 29:24, 23:24, 20:23). Во второто полуфинале од 14:40 часот се среќаваат селекциите на САД и Германија.

Капитенот Богдан Богдановиќ ја предводеше Србија до финалето на Светското првенство со 23 поени, а го следеше Никола Мулутинов со 16 поени и десет скока. А Огњен Добриќ постигна 16 поени, Марко Гудуриќ додаде 12, а Алекса Аврамовиќ десет поени.

Во канадскиот тим, кој го одигра првото полуфинале на Мундобаскетот во историјата, најефикасен беше Еј Џеј Берет со 23 поени, додека Шеј Гилгес-Александер мечот го заврши со 16 поени.

Србија подобро го започна натпреварот и по двете врзани тројки на Добриќ и Богдановиќ поведе со 8:1, но Канада веднаш одговори на ист начин преку Берет и Олиник. Канаѓаните потоа стигнаа до плус три (10:13) на четири и пол минути пред крајот на првиот период, но потоа застанаа.

Следеше серијата на Србија од 11:0, која ја започна Добриќ, а повторно ја заврши одличниот Аврамовиќ, за водство на Србија од 21:13. Серијата на Србија ја прекина Олиник кој влезе во последната минута, но избраниците на Светислав Пешиќ на првиот одмор заминаа со осум поени предност – 23:15.

По четири минути игра во вториот дел и петте врзани поени на Богдановиќ, Србија стигна до првата двоцифрена предност (33:23) и го задржа водството до големата пауза. Најзаслужен за тоа беше Милутинов, кој постигна осум врзани поени за предност од 52:39 на полувремето.

Второто полувреме Канаѓаните го отворија со двете тројки на Брукс, но Србија во тој дел од играта успеваше да го одбие секое нивно налетување и да ја зачува предноста, влегувајќи во последните десет минути од натпреварот со водство од 75:63.

Србија блескаво ја започна последната четвртина – украдена топка и поени на Аврамовиќ, а потоа и тројка на Гудуриќ за плус 17 (80:63). Канаѓаните се обидоа да се вратат во мечот, но не успеаја, а се беше практично готово по четири брзи поени на Давидовац и Богдановиќ за 95:79 на нешто повеќе од две минути до крајот.

За репрезентацијата на Србија ова ќе биде 10-то финале.