Средните училишта во Гостивар ќе се унапредуваат преку Акциски планови со приоритети

Потребите и приоритетите во гостиварските средни училишта ќе бидат срочени во Акциски план, кој има за цел да го подоби квалитетот на образовниот процес. Иницијативата за вакви планови ја покрена локалната самоуправа на Гостивар, а започна да се имплементира од средното техничко училиште. Работна група составена од професори, ученици, родители и педагошко-психолошката служба дискутираше за начините како да се унапреди наставата.

„Техничкото е пилот училиште во кое го спроведуваме овој проект, се надеваме дека ќе даде ефекти и да продолжиме со останатите училишта. Многу е важно да се знаат реалните потреби на училиштата, за да се одредат вистинските чекори кои потоа треба да се преземаат за доброто на учениците“, изјави раководителката на општинскиот Сектор за образование , Аслијан Снопче.

Според директорот на училиштето Бесир Салиу, најголем акцент ќе биде ставен на практичната настава. „За нас како техничко училиште секако многу важно е изведувањето на практичниот дел од наставата и тоа ќе биде еден од главните приоритети. Од овие состаноци очекуваме да произлезат и други приоритети за кои ќе се дискутира“, рече Салиу.

Модераторот на проектот, Африм Илјази ја истакна важноста од креирање Акциски планови, со кои ќе се добие појасна слика за потребите на училиштата во насока на подобро образование за децата.