Средношколци од економското училиште создадоа паметни канти за селекција на отпад

Во средното економско училиште во Гостивар  денес беа поставени паметни канти за селекција на отпад, изум на тим ученици од училиштето, за чија реализација добија поддршка од Програмата UPSHIFT за иновативни решенија.

Средношколците заедно со својот ментор, професорката Анета Талеска Манеска, развија апликација која го регистрира секое парче отпад фрлено во кантата, а на секое 100-то лице кое ја користи кантата, му следува симболичен подарок: усб, слушалки за мобилен телефон и слично.

„Целта е да се подигне свеста кај младите за селекција на отпадот и да се поттикнат тоа да го практикуваат секојдневно. Ова е уште еден успешен проект на економското училиште. Нашата апликација беше избрана во конкуренција од вкупно 40 училишта. Само пет, меѓу кои и ние добивме поддршка од 2.000 евра за реализација на идејата“, вели менторката Талеска Манеска.

Учениците во гостиварското средно економско училиште на располагање имаат шест паметни канти во кои може да селектираат пластика, метал и друго.

Програмата UPSHIFT е поддржана од канцеларијата на УНИЦЕФ во Скопје и Фондот за иновации и технолошки развој.