Старата џамија во Равен ќе биде целосно обновена до крајот на 2023 година

Претставници на Конзерваторскиот центар во Гостивар и Министерството за култура попладнево беа во посета на старата џамија во гостиварското село Равен, во кој објект изминатите години почнаа да се реализираат активности за реставрација. Од таму најавија дека проектот ќе продолжи и во наредната година, со што џамијата ќе биде целосно обновена.

„Со поддршка на Министерството за култура, во изминатите 5 години, презедовме конкретни чекори за реализација на етапите за реставрација на старата џамија во Равен. Сигурна сум дека до крајот на 2023 година, според оперативниот програмски план на Конзерваторски центар Гостивар, старата џамија ќе биде целосно обновена и ќе блесне со својот автентичен изглед, за што нема да изостане поддршката од Министерството за култура. Мисијата на Конзерваторскиот центар во Гостивар е да ги зачува малиот број на објекти кои останале со вредности на културно наследство, вклучувајќи ги Беговата куќа, Комплексот на Саат Џамијата, старите џамии и цркви, стара селска архитектура, недопрените археолошки локалитети, старите тврдини на многу локации во Гостивар.“, рече директорката на Конзерваторски, Хирије Саити.

Иако во Равен беше најавено присуство на министерката за култура, Бисера Костадиновска-Стојчевска, во последен момент тоа беше откажано, а како претставник од Министерството се обрати Афет Јашари, советник во институцијата.

„При посетата на овој објект кој е дел од заштита на културно наследство сакаме да прикажеме дека џамијата во Равен во континуитет ќе биде поддржана од Министерството за култура и за 2023 година, се со цел да се врати стариот сјај на џамијата“, рече Јашари.

За 2022 година, Министерството за култура одобри 11 проекти на Конзерваторски Центар  меѓу кои: археолошки ископувања во три тврдини во периферијата на Гостивар, валоризација на Вруток, одржување на стари објекти кои се под заштита на културното наследство, меѓу кои и Медресето, Саат кулата и портата на комплексот Саат џамија, реставрација на некои делови од Беговата куќа, обработка на фреските и иконите во црквата Свети Димитрија и други.