Стартување и управување на возилото во зимски услови

Зимата си има свои убавини, но студенилото знае да биде непријатно и да создаде нервози. Наутро, не баш на драга волја, но некако и ќе успеете да се извлечете од под јорган за на работа, на училиште или за други обврски. Но, тие што седнуваат за волан, имаат уште една мака. Да го загреат и стартуваат автомобилот. Прочитајте што е корисно да знаете за старт и возење на возилото при студено време.

Пред да го стартувате моторот на автомобилот темелно исчистете ги прозорците, светлата и трепкачите. Опасно е да се тргне со замаглени прозорци затоа е потребно во неколку минути да обезбедите оптимална видливост. Во системот за перење на ветробранските стакла треба да се стави пропишана течност, но мразот, како и росата треба да се отстрани со стружење на ветробранското стакло, а не со бришачите. Ако постапувате спротивно, многу лесно и многу бргу ќе ги оштетите бришачите (односно нивните гумени „метлички“).

Задолжително исчистете ги и надворешните ретровизори, бидејќи тие ви ја обезбедуваат страничната видливост. На тој начин ќе ја имате потребната прегледност при почнување на управувањето.
По неколку минути работење, агрегатот малку се загреал и воздухот што влегува преку дифузерите за вентилација почнува да ја суши влагата од внатрешната страна на стаклата. Неопходно е да имате при рака и мека крпа, за ако има потреба, да се избрише внатрешната страна на ветробранот.

Во прво време возете внимателно и без брзање, бидејќи треба да почекате моторот потполно да се загрее, за вентилацијата да почне да работи со полна сила. Внимателноста е неопходна и поради незагреаните (студени) пневматици, што на студениот асфалт немаат добар грип за подлогата и се создава голем ризик од пролизнување, при сопирање и брзо возење низ свијоци. Ова станува екстремно опасно ако на лизгава замрзната сообраќајница возите со летни гуми. Добри зимски гуми вредат повеќе од се’ и на нив не треба да штедите. Не правите добар избор ниту кога монтирате стари користени зимски гуми, особено ако длабината на „шарката“ е помала од четири милиметри. Без оглед на финансиската и економската криза најисплатливо решение е да купите добри, нови, некористени зимски гуми.

Замрзнатите делови на коловозот најчесто се среќаваат на надвозниците, во клисурите, на влезовите во тунелите, како и на местата во осој (ретко изложени на сонце). Налетувањето на мраз со несмалена брзина значи сигурно излетување од патот, што тешко може да го спречи и највештиот возач. Во случај кога температурата е под нулата треба да се вози внимателно и кога коловозите се суви, бидејќи гумите тогаш полошо се лепат за патот. Управувањето станува потешко и секое вртење и менување насока на движење, како и кочење станува опасно.