Став: Најдоброто од тебе допрва доаѓа!

Денес, јас сум ТИ. Убаво прочита, верувај ми! Матурските фешти ми создаваат анксиозност, родителите повозбудени од нас-чинам веќе ни прават генерална проба на нашите идни свадби. Главата станува експрес лонец  кој прекипува од фејсбук слики и фенси понуди за матурски пакети за секој џеб. Чекај малку… секој џеб? Сигурни сте? Не е баш така. Во секој клас секогаш постојат по неколку наши пријатели со кои сите овие години дишевме ист воздух во училиштата. А дома? Таму како ни е, знаат само најблиските и понекое пријателче блиско на душата. Несомнено современиот стил на живеење го разбуди глумецот во нас. Повремено сме Пепелашка (особено кога од нас дома ќе побараат да го изнесеме ѓубрето)… ама на училиште мора да сме Селена Гомез или Кардашиан. Или ако си момче мора да потсетуваш на некој тип од бендовите кои ги слуша твојата симпатија. Мора да се билдаш. Мора да имаш бесна кола или мотор. Никој  не сака веќе да шета за рака и пеш. Не знам јас кога… ама ете нормалното станало – бљак! И се`е поврзано со МОРАШ! (Еден ден, ќе ви текне дека баш кога ќе ви велат мораш – најмалку ќе сакате.)

И каква е таа припрема за матурска без најскапите гелни нокти, без посета кај најдобрата фризерка или шминкерот кој ќе ве претвори во „во бомбона на потпетици„ и за еден час ни дома нема да ве познаат да не е изводот на родени. Aмa  нeкa  пукнат  сите оние што ги потенцирале вашите кожни, ни малку битни проблемчиња… и нека му е криво на оној од другиот клас што никогаш не возвратил на вашето “здраво“ во град. Родителот кој може, ќе овозможи да се претворите во опасен предизвик.  Родителот кој не може,  ќе го мразите и ќе го доживувате како уништуваш на вашиот момент.

Никому не му текнува дека модата одамна се враќа. Никому не му текнува дека многумина од вашите пријатели и пријателки имаат нос за убави парчиња по локалните бутици а некогаш и од омразената Шутка. Кога би знаеле колку пати сте паднале во несвест од фустаните на вашата другарка или фармерките на другарот – кои биле набавени баш од таму. Да знаете, би си мавнале шамар за сите испади дома што не сте добиле фустан од Versace или костум од Hugo Boss. Да знаете  само колку  вешти анонимни шивачки од парче платно прават чуда,  а можат да го преобликуваат винтиџ фустанот од вашата мајка во предмет на завист, бидејќи модата се враќа драги мои!

Знаете што не се враќа? Времето. Еден убав ден, ви тврдам… речиси и нема да се сеќавате на она што сте го носеле вечерта. Ќе паметите еден куп глупости, смешки и случувања со кои ќе го потполните менталното портфолио со кое ќе се претставите пред своите потомци и анегдоти кои ќе ги споделувате на работното место. Ќе паметите скршени потпетици и расипани фризури и разговорите со соучениците кои не така одамна ви се чинеле недостапни, смотани или тивки. И можеби на момент ќе ви биде жал што не сте им дале шанса на некои  луѓе поубаво да ги запознаете. Онака, под лушпата што сите ја носиме, да останеме неповредени. Се` е  момент, па и матурата. Матурската вечер и аутфитот не ве дефинираат кои сте.

Но, јас не се согласувам со она: кој ве цени,  ќе ве сака какви што сте. Напротив, не бидете конформисти. Бидете најдобрата верзија од себе си.! Поради себе.

Кога ќе се исклучат светлата на денот и ќе ја избришеш шминката или ти, момче кое го оставаш костумот на закачалката за до следниот свечен повод…. сте истите оние што секоја приквечерина одат до продавницата да си купат нешто благо. Зашто животот не е  фабрика за исполнување желби, ниту е секогаш сладок… ама кога му ставаш малку шеќер, може да биде најубавиот десерт што си го овозможил! ПРАВИ СПОМЕНИ, НЕ ФРУСТРАЦИИ!

Џини До