Сте се искачиле ли некогаш до врвот на Саат Кулата?

Саат Кулата е едно од првите места кои странските туристи изразуваат желба да го видат, кога се во посета на Гостивар. Симболот на градот е познат, го има на грбот и на знамето на општината, може да се најде на разгледници и на фотографии. За разлика од порано, кога граѓаните и посетителите можеа да ја разгледуваат само од надвор, откако беше реставрирана, Саат Кулата е отворена и за оние кои сакаат да влезат внатре, да се искачат по скалите и од највисокиот дел да уживаат во панорамска глетка на Гостивар.

Од Конзерваторскиот Центар оценуваат дека по реализација на зафатите за реставрирање, објектот станува се поатрактивен за посетителите. „Интересот за посети е голем, особено за оние кои не се од градот и за странците. При прво доаѓање во Гостивар, домаќините им го претставуваат градот и Саат Кулата, како симбол кој вреди да се види“, вели Аднан Фејзулаи, директор на Конзерваторски Центар Гостивар.

Со цел за промоција на овој значаен споменик од културно-историското наследство на Гостивар, Конзерваторскиот Центар има спроведено Отворени денови, а за наредната учебна година се планираат и организирани посети за учениците од гостиварските училишта. Граѓаните кои се заинтересирани да ја разгледаат кулата на своја иницијатива, треба да се обратат во Центарот или Муфтинијата за да добијат клуч од влезната врата.

Според записите, Саат Кулата била изградена во 17 век од Исмаил-ага, чие име како донатор го пишува на плочата пред влезната врата, со османлиско писмо. Во времето кога била изградена, сите други објекти биле пониски, па кулата се јавува како доминантна. На почетокот имала само механички часовник и камбана која со своите звуци ги означувала часовите. За време на Првата светска војна, дрвената конструкција изгорела и останале само камењата на ѕидовите. Кулата била обновена во 1986 година. Во јануари годинава беа поставени нови механизми на часовниците, кои сега го покажуваат точното време.