Стигнаа 24.000 вакцини Астра Зенека, од среда вакцинација на ризичните групи

На аеродромот во Скопје утрово пристигнаа 24.000 дози вакцини против ковид од производителот Астра Зенека, набавени преку Ковакс системот. Министерот за здравство, Венко Филипче најави дека вакцинацијата на населението ќе почне од среда, со ризичните групи граѓани кои се пријавиле за имунизација.

„Сега ние целосно сме посветени системот на имунизација да се спроведе ефикасно и брзо, очекуваме за брзо време да пристигнат и други вакцини. Се покажа дека има каснење, тоа е поради огромната побарувачка и сите земји се соочени со тој предизвик. Вакцинацијата започнува во среда, во вакцинални пунктови во градовите, први се 20.000 граѓани кои се пријавени, над 75 години со хронични болести. Место за масовна вакцинација ќе биде салата „Борис Трајковски“, рече министерот.