Стојаноска: Талат Џафери да се извини и да поднесе оставка

Опозицијата бара извинување и оставка од претседателот на Собранието Талат Џафери.

„Поминаа повеќе од десет дена, а претседателот на Собранието Талат Џафери, не само што не се извини за неговото безобразно однесување спрема вработените во собраниската служба туку се однесува како ништо да не се случило. Крајно е недозволиво токму од човекот кој што прв го потпишал етичкиот кодекс за однесување во Собранието, најгрубо да го крши и да бега од одговорност и заедно со пратениците од власта да пробуваат на секаков можен начин да го скријат под тепих овој скандал. Џафери најмалку што можеше да направи е да се извини за ваквото однесување и да си поднесе оставка од функцијата Претседател на Собранието.“, истакна пратеничката од ВМРО ДПМНЕ, Дафина Стојаноска, воедно повикувајќи Комисијата за деловнички и мандатно-имунитетни прашања да расправа за санкции кон Џафери.

„Сакаме да му порачаме на Џафери дека колку и да бега од одговорност и да пробува да се заборави овој скандал дека дамката што ја остави зад себе секогаш ќе го прати, а ние секогаш ќе бидеме тука да го потсетуваме дека со неговото однесување и работа е еден од најлошите и најнеспособните претседатели што ги имало Собранието. Исто така го повикуваме господинот Панчо Минов да не одолговлекува и да закаже седница на Комисијата за деловнички и мандатно-имунитетни прашања на која што ќе се расправа за санкции по повод прекршувањето на етичкиот кодекс од страна на Талат Џафери. Доколку Џафери не понесе одоговрност за ваквото однесување ќе даде до знаење до сите пратеници дека етичкиот кодекс на кој што сите заедно работевме, повеќе не важи во законодавниот дом.“, рече Стојаноска.

Пратениците од ВМРО ДПМНЕ денес го пречекаа Џафери во Собранието со транспаренти.