„Стоп за лоши навики“ – Проект за подигнување на свеста за здрав животен стил

Здружението на лекари специјализанти (ЗЛС) наскоро ќе започне со спроведување на новиот проект под наслов „Стоп за лоши навики“, чија главна цел е подигнување на јавната свест за значењето на здравиот животен стил и бенефитите што произлегуваат од него.

„Проектот се темели на фактот дека одржувањето на здравиот животен стил не е само индивидуален избор, туку и општествена одговорност. Со оглед на тоа што кардиоваскуларните заболувања во моментов се и ќе останат водечки причинители на морбидитет и морталитет во светот, потребата од акција е повеќе од очигледна. ЗЛС ќе изработи и објави прв водич за здрави животни навики во нашата земја. Овој водич ќе биде резултат на соработка помеѓу искусни лекари, специјализанти и специјалисти од различни медицински области, во тесна соработка со нутриционисти и фитнес тренери. Водичот ќе биде практичен и лесен за користење, со цел да им обезбеди на граѓаните информации и препораки за одржување на здрав начин на живот, како и насоки за справување со најчестите ризик-фактори кои водат до хронични заболувања.“, информираа од ЗЛС.

Во рамките на проектот, ќе се организираат и серија настани, вклучувајќи и панел дискусија под наслов „Стоп за лоши навики! Време е за промена – одлучи денес”.

„Стоп за лоши навики“ претставува повик до сите граѓани на Македонија да преземат активна улога во подобрувањето на своето здравје и благосостојба, нагласуваат од Здружението.