Страната на ДИК со резултати во колапс, сите партии најавија победа

Официјалната страна кадешто Државната изборна комисија треба да ги објавува резултатите од гласањето на Предвремените парламентарни избори не се отвора веќе половина час. За сега, изостанува информација каков избор на пратеници направиле гласачите на денешниот изборен ден.

Во меѓувреме, партиите од штабовите прогласуваат или очекуваат победа.

„Очекуваме резултатите да ги потврдат бројните анкети за кои бевме сведоци во текот на кампањата. Првичните резултати покажуваат големо водство на СДСМ и коалицијата.“, рече генералниот секретар на СДСМ, Љупчо Николовски.

„Победуваме речиси насекаде. Од дел од досега обработените податоци предноста на ВМРО-ДПМНЕ е најмалку 10 %“, изјави Игор Јанушев, генерален секретар на ВМРО-ДПМНЕ.

„Од информациите што ги имаме до сега насекаде сме во преднос пред ДУИ и очекуваме победа.“, изјави Арбен Таравари, генерален секретар на Алијанса за Албанците.

„Очекуваме да останеме клучен фактор во детерминирање на клучни чекори во државата. Според кампањата и поддршката која ја добивме, очекувам голема изборна победа“, изјави Бурај Османи, портпарол на ДУИ.