Студеното време го преполови пазарот во Гостивар

Поради студот и снегот, вторничниот пазарен ден во Гостивар помина со помалку тезги и послаба понуда на производи. Екстремните температури натераа поголем дел од тезгаџиите и купувачите да си останат дома за да не ризикуваат по здравјето. Сепак, имаше и од оние похрабрите, кои покрај студот решиле и овој вторник да продаваат на гостиварскиот градски пазар. Тие рекоа дека при вакви временски услови прометот е послаб, производите тешко се транспортираат, а овошјето и зеленчукот лесно може да замрзнат.

За разлика од повеќето продавачи и купувачи кои се пожалија на ладното и снегот, на пазарот во Гостивар сретнавме и еден 76 годишен гостиварец со поинакво мислење. Тој ни рече дека без разлика дали е студено или не, секој вторник си излегува на пазар.

На пазарот денес најмногу се продаваа портокали, кои чинеа 60 до 70 денари по килограм, банани, по цена  од 40 денари за килограм или 3 кг. за 100 денари како и јаболка кои беа поефтини, односно од 20 до 40 денари за кг.