Судската администрација во Гостивар протестира: Револтот е голем, платите мизерни, додатоците не се исплаќаат

Вработените во судската администрација во Основниот и Апелациониот суд во Гостивар излегоа на едночасовен предупредувачки протест преку кој бараат покачување на платите и додатокот на плата. Судската служба протестираше од 10 до 11 часот пред зградата во која се сместени судовите. Администрацијата во судовите вчера протестираше во цела држава, а во Гостивар ова беше втор ден протест по ред.

„Револтот е голем, платите ни се горе-долу на минималец, додатоците на плата не ни се исплаќаат секој месец, работите се ставаат „под тепих“ , нема трајно решение. На пример овој месец револтот е многу голем, кога доаѓа краен рок за исплата на плата министерот во последен момент не ги одобрува доадтоците, плата уште намаме земено, ќе пробиеме и законски рок. Бараме 35 % додаток на плата, зголемување на плата и нагласуваме дека не се сложуваме со ова што се договорија синдикатите со Влада, за 10 % зголемување на плата и 10 илјади денари регрес, ние не ги овластивме за такви проценти и такви износи да се договараат.“, рече Игор Симески како претставник на судската администрација.

Вработените кои протестираат подвлекоа дека не се против зголемувањето на платите на судиите, туку бараат нивните месечни примања да стигнат некое задоволително ниво.

„Да не бидеме погрешно сфатени од страна на нашите колеги функционери, немаме ништо против нивното зголемување, заслужуваат плата, затоа што решаат судбини на луѓе. Меѓутоа нашите плати се мизерни, таков износ за денешно време е навистина неподносливо, не стасува за основни трошоци“, рекоа тие.

Доколку не бидат земени предвид нивните барања, од 1-ви септември најавен е генерален штрајк.

Во административните служби на Основниот и Апелациониот суд во Гостивар има околу 140 вработени.