Сусамот и неговите благодети

Сусамот, или семето од сусам (што е најчестата форма што ја користиме), созрева во мешунките на растението Sesamum indicum. Познато е дека семките од сусам имаат бројни потенцијални здравствени придобивки и се користат во исхраната и народната медицина со векови. Еве ги главните здравствени придобивки од сусамот.

Сусамот е добар извор на влакна, кои спречуваат бројни болести

Влакната се супстанции неопходни за правилно функционирање на дигестивниот тракт. Истражувањата велат дека тие можат да играат важна улога во намалувањето на ризикот од кардиоваскуларни болести, дебелина и дијабетес тип 2, како и спречување на малигни заболувања. Во три лажици сусам, што одговара на 30 грама, има 12 проценти од дневното потребно количество влакна за возрасни.

Семето од сусам може да го намали нивото на холестерол и триглицериди

Семето од сусам може да помогне да се намалат факторите на ризик за срцеви заболувања, вклучувајќи ги покачените триглицериди и „лошиот“ ЛДЛ холестерол. Основата на овие тврдења се студиите, кои сугерираат дека редовното консумирање семе од сусам придонесува за овие фактори на ризик за појава на срцеви заболувања. Тајната е првенствено во нивото на масти (15 отсто заситени, 41 отсто полинезаситени, 39 отсто мононезаситени).

Сусамот содржи и лигнани и фитостероли, растителни соединенија за кои е докажано дека имаат ефект врз регулацијата на нивото на холестерол.

Помагаат во намалување на крвниот притисок

Високиот крвен притисок е главен фактор на ризик за срцеви заболувања, како и срцев удар и мозочен удар. Семето од сусам во својот состав има висока содржина на магнезиум и антиоксиданси, што е драгоцена помош за регулирање на крвниот притисок и спречување на таложење на наслаги во артериите. Тоа е важно за спречување на атеросклероза. Слични својства имаат и споменатите лигнани и витаминот Е, кои исто така се наоѓаат во сусамот.

Семе од сусам за поздрави коски

Семето од сусам, без разлика дали е излупено или не, содржи неколку хранливи материи кои влијаат на јачината на коските. Најмногу калциум има во лушпата од сусам, но го има и во телото на семките. Во 30 грама сусам има 22 отсто од дневниот препорачан внес на калциум, 25 отсто магнезиум, 21 отсто од дневните препорачани вредности на цинк и најмногу манган, 32 отсто. Повеќето од овие корисни материи ќе ги користиме ако ги натопиме во вода или ако ги тостираме. Ова ќе го неутрализира ефектот на оксалатите и фитатите, анти-нутриенти од сусамот, кои ја попречуваат апсорпцијата.

Подобра контрола на нивото на шеќер во крвта

Семето од сусам содржи протеини и здрави масти, но и мала количина јаглехидрати. Ова е исклучително важно за спречување на отпорност на инсулин и одржување на здрави нивоа на шеќер во крвта. Семето од сусам содржи и пинорезинол, кој исто така може да го инхибира дејството на малтазата, важен дигестивен ензим. Улогата на малтазата е да ја разградува малтозата, која се создава во нашите црева со варење на скроб. Се наоѓа и како засладувач во одредени намирници.

Како сусамот може да помогне во крвната слика?

Семето од сусам е богато со железо, бакар и витамин Б6, кои се неопходни за формирање и оптимална функција на крвните зрнца. Железото е суштинска компонента на хемоглобинот, транспортер на кислород низ крвните клетки и крвотокот. За формирање на хемоглобинот потребни се бакар и витамин Б6, а 30 грама сусам содржи 24 отсто од дневното препорачано количество железо.

Придобивките од сусам за здравјето на тироидната жлезда

Сите хранливи материи што ги содржи сусамот: железо, селен, цинк, бакар и витамин Б6, се потребни за оптимална функција на тироидната жлезда. Селенот, кој е особено важен поради неговата концентрација во истиот орган и неговата значајна улога во создавањето на хормони, се наоѓа во сусамот, со 18 проценти од дневната потребна вредност во 30 грама.