Свечен ден за матурантите од економското училиште во Гостивар, промоција и симболично фрлање на капите

Генерацијата 2019/2023 година од средното економско училиште во Гостивар денес го заокружи четиригодишното образование, дружење и делење заеднички посебни моменти кои се паметат цел живот, на пригодна свеченоста во дворот на училиштето.

Настанот беше организиран како промоција на матурантите со доделување на пофалници за најуспешните и симболично фрлање на капите.

„Почитувана генерацијо, го положивте испитот на зрелоста, испишавте уште една страница од романот наречен живот, ја искачивте планината наречена средно образование, но овде не завршува предизвикот. Планинарот по освоениот врв, размислува за нови врвови, писателот за нови романи. Пред вас се отвора бескрајно просторна иднина, професорите ви дадоа кријла и ви го покажаа патот. Вие сте оние кои треба широко да ги отворите крилјата и да се вивнете кон вашиот сон.“, се истакна во воведниот дел на свеченоста.

Директорот на економското училиште Михајло Ѓиноски упати честитки до матурантите, посакувајќи им натамошни успеси.

„Четири години поминаа брзо, сите денови беа различни, исполнети со убави нешта и изненадувања. На секој од вас успеавме да пренесеме знаења, кои се надевам дека ќе одлучите и понатаму да ги надградувате. Животот ќе се однесе по различни патишта , но сигурен сум дека секогаш ќе се сеќавате на средношколските денови поминати тука.“, рече Ѓиноски.

На свеченоста: Мефаил Таири, Елиф Мемедовска, Фуркан Максут, Шерифе Незири и Ерзана Адеми добија пофалници како ученици на генерацијата за своите успеси постигнати низ средношколските денови во економското училиште.

На промоцијата на матурантите присуствуваа професори, родители, претставници од општината и други гости.