Свечен собир во Гостивар по повод празникот 8-ми Септември

Гостивар го одбележа денешниот празник, Денот на независноста на Република Македонија со свечен собир и положување на цвеќе. Прославата, во организација на Општинскиот одбор на Сојузот на борци од Гостивар, се одржа пред споменикот на паднатите борци во градскиот парк. На одбележувањето присуствуваа граѓани, ученици, претставници од политички партии, здруженија и организации.

Професорката по историја Катица Аврамоска преку реферат потсети на денот на референдумот од 1991 година и значењето на празникот.

„Осми септември се претвори во вистински празник, затоа што од 1 милион 495 илјади 626 гласачи на референдумот излегоа вкупно 71,85%. Од излезените, дури 95,09% одговорија позитивно на поставеното прашање. Бројките беа обнародени на плоштадот Македонија во Скопје, чин на кој првенците на државата и на политичите партии го испиваа славеничкото шампањско.  Граѓаните со песни и игра ја прославија оваа своја пробеда како израз на колективната свест созреана сама да си ја определи иднината и сама да ја сонси одговорноста на таа одлука“, потенцираше професорката Аврамоска.

Чествувањето на 26 години самостојна држава продолжи со положување на букети цвеќе на споменикот на паднатите борци. Цвеќе положија претставници на боречката организација, Здружението на пензионери, Средното економско училиште и од гостиварските ограноци на Социјалдемократскиот сојуз на Македонија и на ВМРО ДПМНЕ.

Со едноминутно молчење им беше одадена почит на оние кои го положиле својот живот на слободна и независна држава.

Осми септември како државен празник е неработен ден за сите граѓани на Република Македонија. Сепак, може да се забележи дека најголемиот дел од приватниците низ градот работат со вообичаеното темпо. На јарболите во Гостивар од вчера се истакнати знамиња.