Свеченост на првиот училишен ден во ОУ „Единство“ Гостивар, меѓу гостите Шаќири и Таравари

Основното училиште „Единство“ во Гостивар на стартот на новата учебна година  организираше свеченост исполнета со забава, музика, дружење со маскоти и пригодна културно-уметничка програма подготвена од ученици. Дечињата кои за прв пат седнуваат во училишните клупи имаа можност да се запознаат со учителките и со своите нови другарчиња со кои понатаму ќе поминуваат голем дел од времето.

„Среќен ден за сите деца кои се враќаат на училиште, со желба да учат и повторно да се сретнат со своите другарчиња. Вака започнува следниот предизвик за учениците и родителите. За првачињата започнува долгиот пат на знаења. Управата на училиштето на сите ученици им посакува успешна година, со високи резултати. За првачињата големо добредојде“, рече директорката на училиштето, Влера Фидани.

На настанот, меѓу гостите беа министерот за образование Јетон Шаќири и градоначалникот Арбен Таравари.

„Ова училиште е симбол како треба сите заедно да живееме, сите ние кои сме од различни заедници во оваа земја, односот меѓу нас да биде добар, и таквите пораки да ги испратиме кај децата, учениците. Им честитам на сите првачиња и на сите основци, им посакувам што побрзо да го остварат својот сон, истовремено и на сите наставници кои ќе им помагаат во тоа. Би сакал да кажам дека оваа година сме поподготвени од лани. Сите учебници се доставени, освен мал дел за шесто одделение кои ќе се завршат во септември. Второ, дека платите во образованието од септември ќе бидат повисоки за 10%,“, рече министерот.

Во ОУ „Единство“ од оваа учебна година почнува да функционира и целодневен престој за ученици, нешто што доаѓа како резултат на барање на родителите кои имаат потреба.

„Како општина се обидовме минатите шест години да обезбедиме што подобри услови за децата во Гостивар и во градинките и во училиштата. Во ова училиште за прв пат ќе функционира и дневен престој. Не ми преостанува ништо друго, освен на сите ученици да им посакам многу здравје и полно среќа во оваа учебна година и во животот“, кажа градоначалникот, кој утрово беше и на приемот на првачиња во училиштето во Дебреше.