Свеченост по повод празникот Илинден во Гостивар

Во слава и чест на големиот празник Денот на Републиката – Илинден, вечерва во Гостивар, во големата сала на Центарот за култура „АСНОМ“ се одржа пригодна свеченост. Програмата на празничното одбележување беше исполнета со рецитации, драматизација и музички изведби, сите посветени на македонската историја и непокор, традициите, патот на создавањето на државата, вековните идеали на македонскиот народ.

Настанот го организираше гостиварскиот Центар за култура, кој како јавна установа што го носи името АСНОМ, на денешен датум, 2-ри Август слави и патронат.

На свеченоста настапија Рената Матеска, Ива Крајоска, Ана Марија Исајлоска, Роберт Ристов, Мирјана Ристов и Никола Кузелов. Музичкиот дел беше резервиран за членови на оркестарот на националниот Ансамбл „Танец“: Сашко Митев, Кристијан Јаневски, Златко Димитриовски, Андреј Трајковски и Дамјан Зафироски. Пред присутните беше презентирано и видео со историски осврт на настаните врзани со Илинден.

Одбележувањето е поддржано од Министерството за култура.