Свеченост во Гостивар по повод утрешниот празник, Денот на востанието и Ден на борецот

Во пресрет на празникот 11 Октомври, Денот на народното востание и Ден на борецот, во Гостивар денес се одржа свеченост на која присуствуваа граѓани, ученици, претставници од политичките партии, здруженија и организации.

Прославата традиционално ја организираше општинскиот одбор на Сојузот на борци – Гостивар, а за културно-уметничкиот дел од програмата беа задолжени основците од училиштето „Гоце Делчев“.

За историската димензија и значењето на празникот пред присутните зборуваше професорот по историја Горан Павловски.

„Овој настан од историјата е само продолжување на борбата на Македонскиот народ, која ја водеше низ вековите, а кој во поголема мера се разгори во втората половина на 19 и почетокот на 20 век. Борба која донесе големи историски настани за Македонскиот народ.“ рече во својот реферат Павловски.

Учениците заедно со своите наставници ментори подготвија рецитации посветни на татковината, борбата за слобода и вредностите кои се негуваат во Македонија.

Во знак на почит кон загинатите борци во борбите за слобода на Македонија беа положени букети цвеќе на споменикот подигнат во нивна чест во градскиот парк во Гостивар.