Света архијерејска Литургија во бигорскиот скит во Битуше посветен на браќата Кирил и Методиј

Свештената бигорска Обител информира дека на денот кога Православната Црква го слави споменот на Светите Рамноапостолни сесловенски просветители, солунските браќа Кирил и Методиј, 24 мај, ќе се отслужи утрена и Света архијерејска Литургија, во Бигорскиот скит посветен на солунските браќа, во селото Битуше.

Утрената богослужба ќе почне во 8 додека Светата архијерејска Литургија во 9 часот а со неа ќе чиноначалствува Неговото Преосвештенство, епископот Антаниски г. Партениј, заедно со архимандритите и јеромонасите од бигорската Обител.

„Во храмот, кој сè уште се наоѓа во фаза на изградба и оваа година молитвено ќе се собереме, за да испросиме од Бога и од Светите Браќа благослов и поскоро завршување на нивниот нов дом. На Светата Литургија ќе присуствуваат сите монашки заедници под духовно раководство на нашиот Старец, епископот Антаниски г. Партениј, односно братството на Бигорскиот манастир и сестринствата од Рајчица, Пречиста и Кнежино“, стои во објавата на Бигорски манастир.

Од година во година се поголем е бројот на оние кои присуствуваат на Светата архијерејска Литургија во овој скит, оддавајќи им почит на сесловенските просветители.

Скитот посветен на светите рамноапостоли сесловенски првоучители и покрстители, солунските браќа Кирил и Методиј се наоѓа на висорамнината под планината Крчин, над долнореканското живописно село Битуше, општина Маврово и Ростуше.

Темелите беа осветени и поставени на 31 мај 2014 година, а првата литургија беше одржана на 24 мај 2017 година.

Иницијативата за градење и идејното решение беа на владиката Партениј, игумен на Бигорскиот манастир, кој има голема љубов и почит кон светите браќата Кирил и Методиј.

фото:Бигорски манастир