Света архијерејска литургија во црквата Света Петка во Гостивар по повод денешниот празник

На денот кога се прославува споменот на преподобната мајка Параскева – света Петка (Петковден), во храмот „Св. Петка“- Гостивар, беше отслужена света архиерејска Литургија на којашто чиноначалствуваше Неговото Високопреосвештенство Митрополитот Тетовско-гостиварски г. Јосиф.

Во својата беседа митроплитот г. Јосиф меѓу другото истакна:

„Црквата никогаш не била ниту може да остане без светители. Тие се гарантот за вистинитоста на нашата вера, односно тие се потврда на успешноста на проекцијата што за животот на секој човек ја постави нашиот Спасител Господ Исус Христос. Почитувањето на светителите од наша страна се изразува со тоа што ние ним им се обраќаме за застапништво, за помош, односно да се молат пред Божјиот престол за нас, зашто тие се нашите небесни пријатели. Денеска овде во овој храм во Гостивар, ја прославуваме света Параскева-Петка која од најмлади години ги слушнала Христовите зборови: „Кој сака да врви по Мене…” и ги сфатила многу сериозно. И покрај тоа што потекнувала од богато и угледно семејство, таа го презрела целокупниот свој имот и богатство, се оддала на подвижнички и испоснички живот, се оддалечила од родниот Епиват и се посветила на подвиг во Јорданската пустина. Откако ѝ се јавил ангел Божји и ѝ соопштил дека Божјата волја е да се врати во родниот крај пред да се пресели во вечноста, таа ја послушала оваа порака. Откако биле откриени, нејзините свети мошти најпрво биле однесени во Цариград, а од таму во Трново, па во Белград, за на крај да бидат пренесени во Јаш, каде и денес почиваат. Бог ја прославил заради нејзината силна и непоколеблива вера. Затоа, секој што кон неа се обраќа со вера, го добива нејзиното застапништво за избавување од секакви зла. По нејзините молитви, Бог да ги услиши нашите прозби. Да живееме во согласност со нашата православна вера и да измолиме милост Божја за спасение на нашите души. Имајте благословен ден. Оние кои ја имате за своја семјна слава денешната светителка св. Петка, нека се моли на Бога за вас и вашите семејства. Амин!“.

На светата литургија верниците се причестија со Светите Тајни на христијанството.

фото:тетовско-гостиварска епархија