Света литургија и благословување на грозјето за празникот Преображение Христово во Гостивар

Големиот христијански празник Преображение Христово во Гостивар се одбележа со света литургија и благословување на грозјето. Митрополитот тетовско-гостиварско г.Јосиф утрово најпрво богослужеше литургијата во храмот „Успение на Пресвета Богородица“, а потоа и во манастирот во изградба „Свето Преображение“ во населбата Циглана го изврши чинот на благословување на грозјето, што е традиција за празникот.

„Се молиме на денешниот празник Преображение, Господ да ги преобрази нашите срца, нашите умови, нашето битие, да бидеме подобри верници, подобри луѓе и да докажеме на дело дека сме вистински христијани“, нагласи Владиката г.Јосиф.

Годинава поради ковид пандемијата, не се организираше масовна прослава и собир во манастирот во Циглана, како што беше пример претходните години. Вратите на манастирот денес се отворени за верници, кои доаѓаат со почитување на мерките за заштита, палат свеќа и се помолуваат за здравје и мир.