Света златоустова литургија за Крстовден во „Св.Петка“ во Гостивар: Да го носиме својот Крст без спротивставување и роптање

На денешниот празник, Воздвижение на Чесниот Крст – Крстовден, Митрополитот Тетовско-гостиварски г. Јосиф, служеше Света Златоустова литургија во храмот „Св. Петка“ во Гостивар, во сослужение со свештеници од Гостиварското архиерејско намесништво.

Пред започнувањето на Литургијата, според Црковниот устав, среде храмот беше изнесен светиот Крст, каде што беше воздвижен, а свештенството и верниците се поклонија пред духовното оружје, кое е слава на Црквата и поткрепа на верните.

Во својата беседа Митрополитот г. Јосиф меѓу другото истакна:

„Денеска го прославуваме Воздвижението на чесниот и животворен Крст Господен. Тоа е празник за целиот свет. Се воздигнува Крстот Христов за да паднат бесовите и да бидат победени. Се воздигнува за и ние да се воздигнеме и да стоиме цврсто. Да гледаме кон небото и да си спомнеме за страдањата Христови. За страдањата кои Он ги претрпе заради нашето спасение и да Му благодариме за Неговата безмерна добродетел кон нас. На овој ден се празнуваат два настани поврзани со Чесниот Крст: прво, пронаоѓањето на Чесниот Крст на Голгота, и второ, враќањето на Чесниот Крст од Персија во Ерусалим. Ние денеска овде во овој храм во Гостивар, се поклонуваме на Животворниот Крст Господов, благодарејќи Му на Бога за Неговата љубов. Му благодариме затоа што не нè остави и не Го жалеше Својот Единороден Син. Го жртвуваше за да можеме да дојдеме до Него и да се вратиме во Татковиот дом. Драги браќа и сестри, со искрена молитва, со очистено срце, со понизност и смиреност, да пристапиме и да се поклониме пред чесниот Крст Господов и запомнете дека треба да го носиме својот Крст без спротивставување и роптање, бидејќи вистинскиот христијанин никогаш не се противи на божјата промисла. На крај да им честитам именден на сите кои имате име Крсто, Крсте, Крстана. Нека чесниот и животворен Крст сите не заштитува. Амин!“

На литургијата верниците се причестија со Светите Христови Тајни.

фото: тетовско-гостиварска епархија