Светот го изгуби Стивен Хокинг – научникот почина на 76 годишна возраст

Научникот Стивен Хокинг, еден од најголемите умови на своето време, почина на 76-годишна возраст во својот дом во Кембриџ, Британија, јавија светските медиуми.

Хокинг дипломирал на Оксфорд, а докторирал на Кембриџ, каде и ја продолжил својата академска кариера. Има добиено десетина почесни титули. Ја проучувал теоријата на релативитет на Ајнштајн, покажувајќи дека таа не може адекватно да ги опише „црните дупки“. Астрофизичарот Хокинг во својата кариера разоткрил многу мистерии токму за „црните дупки“, како на пример дека тие може да емитуваат топлотно зрачење. 

Во 1963 година на Хокинг на 21 годишна возраст му била дијагностицирана  амиотрофична латерална склероза, болест на моторните неврони, поради која не можеше да го движи телото и речиси единственото нешто со кои можеше да управува беше неговиот мозок. Поради болеста беше врзан за инвалидска количка повеќе од 40 години и зависен од компјутеризиран гласовен систем за комуникација.