Светски ден на енергетска ефикасност – Знаеме ли да штедиме енергија?

Датумот 5 март, светот го одбележува како Ден на енергетската ефикасност и тој датира од 1998 година, кога во Австрија бил одржан првиот состанок на светските експерти од оваа област. Енергетска ефикасност значи намалување на потрошувачката на енергија за производство на стоки или услуги, без притоа да се наруши квалитетот на производот или услугата, животниот стандард или економската активност.

Меѓународната агенција за енергетика, која важи за една од најважните организации посветена на состојбите во енергетиката алармира дека потрошувачката на енергија ќе се зголеми за 40%, во наредните две децении. Овој факт укажува на значењето на енергетската ефикасност во креирањето на националните енергетски политики.

Македонија како и балканските земји имаат нерационална потрошувачка на енергија. Споредено со земјите од ЕУ ,трошиме неколкупати повеќе енергија за ист производ или услуга.