СВР Тетово: Да не се организираат борби на кучиња, контролите се засилуваат

Секторот за внатрешни работи Тетово со апел и укажување до сопствениците на расни кучиња да не иницираат или организираат борби на вакви животни, зашто тоа е спротивно на Законот на прекршоци против јавниот ред и мир и според член 9 од овој закон, тие ќе се соочат со поднесоци и парични глоби кои се движат од 500 до 1000 евра во денарска противвредност.

Воедно, во зависност од околностите и крајните последици од користењето на кучињата за борби, истото може да се третира и како кривично дело „мачење животни“ (член 233 од Кривичниот законик), за кое се предвидени парични или казни затвор до една година.

Секторот за внатрешни работи Тетово до крајот на овој и наредниот месец ќе ги засили контролите на овој план и сите вакви случаи ќе бидат заокружени со соодветни поднесоци. Ова, дотолку повеќе што нелегалните борби на кучиња многу често се поврзуваат и со незаконско обложување што, пак, претставува друго кривично дело.