СВР Тетово: Да не се шират невистини и измислици, нема ниту еден случај на киднапирање на дете

Секторот за внатрешни работи Тетово ги информира граѓаните дека на тетовско-гостиварското подрачје досега не е пријавен ниту еден, единствен случај на киднапирање на деца, ниту други такви и слични настани. Ова е одговорот од СВР Тетово, по одредени информации кои се проширија на социјалните мрежи, вчера и денес, за црно возило „БМВ“ со скопски регистерски таблици, управувано од постар маж, со намера да киднапира дете од тетовско основно училиште.

„Полицијата ги отфрла како целосно измислени и неточни ваквите информации кои се груби шпекулации и невистини.  Со цел да не се шири непотребна вознемиреност, страв и несигурност, Секторот за внатрешни работи Тетово уште еднаш најофицијално потврдува дека таков случај воопшто не е регистриран на подрачјето кое ингерентно го покрива.“, стои во соопштението од СВР.