Тамара Грујеска во пресрет на Јуниорски Евросонг: Со нетрпение го чекам настапот во Ница, ќе дадам максимум од себе

Опиши ни како се чувствуваш сега, откако ти се исполни една голема желба, а тоа е да ја претставуваш Македонија на детски Евросонг

Чувството е неописливо. Неколку месеци сум пресреќна и превозбудена и со големо нетрпение чекам да настапам на таа голема сцена пред цела Европа, каде што ќе го дадам својот максимум за да ја претставам Македонија во најдобро светло и да ги освојам срцата на сите слушатели и гледачи.

Колку време се подготвуваш за настапот, како течат подготовките, дали е напорно со оглед дека имаш обврски и на училиште? Кој се‘ е вклучен во тимот?

За настапот се подготвувам секојдневно. Заедно со Љупка Јакимовска која е режисерот кој ќе се погрижи за сценскиот настап во Ница, макотрпно работиме секојдневно. Кога станува збор за нешта кои се работат со љубов и од срце, нема простор каде да се вметне напорноста, па така сите обврски без мака ги завршувам на време. Голема благодарност до Македонската радио-телевизија која ми даде можност да бидам претставник на Македонија на овогодинешниот Јуниорски Евросонг во Ница, им благодарам за максималната поддршка која ми ја пружаат и се со мене од самиот почеток. Големо благодарам и до моето училиште, до директорката и класната што секогаш со цело срце ми излегуваат во пресрет и имаат целосно разбирање за се. Исто така, за мојот изглед во Ница, како и за спотот загрижени се Ангелина и Ива од KTN Clothing. Со нетрпение чекам да ви го претставиме комплетниот изглед и сценскиот настап, кој ќе имате прилика да го видите на финалната вечер од Јуниорскиот Евросонг на 26 ноември, со пренос во живо на МРТ 1.

Какви совети добиваш од музичарите со кои соработуваш за детски Евросонг во однос на пеењето, и целокупниот настап на сцената?

Голем број совети добивам секојдневно од многу искусни музичари. Но, оваа прилика ќе ја издвојам, за да им се заблагодарам на Наташа Миха – мојата професорка по соло пеење и Љупка Јакимовска чиишто совети максимално ги прифаќам и применувам.

Што ти претставува најголем предизвик за настапот во Ница и кои се твоите очекувања од ова натпреварување?

Најголем предизвик за мене е да застанам на таа голема сцена и да ја претставам Македонија во најдобро можно светло пред цела Европа. Големи очекувања немам, најбитна ми е дружбата со учесниците и целата таа позитивна атмосфера што ќе ја создадеме во тие седум дена, да ми останат трајно врежани во моите сеќавања, а се останато е бонус за мене и целиот тим.

Кој од останатите учесници ти остави добар впечаток со својата песна и зошто?

Искрена да бидам, не можам да одвојам, бидејќи сите учесници вклучувајќи ме и мене имаме одлична замислена визија која сакаме да ја претставиме најдобро што умееме. Сите се одлични на свој начин, а јас најмногу ценам кога некој е свој и оригинален во тоа што го работи.

Сподели ни некои твои идни планови и желби на полето на музиката

Не сакам предвреме да размислувам за иднината, а планови секако дека постојат. Моментално, максимално сум фокусирана на Јуниорскиот Евросонг и уживам во секој процес поврзан со истиот. А кога се во прашање промените, верувам дека ќе ги има во голем број.