Танчерите од Гостивар се пласираа на Европско и Светско првенство по модерни танци

На Државниот натпревар по модерни танци, што се одржа викендов во Македонската опера и балет во Скопје, танчерите од IDance студио од Гостивар забележаа значителни успеси во повеќе категории.

Во категоријата Мини кидс од 4 до 7 години, групата од Гостивар освои прво место.

Со победа и прво место се закити и гостиварецот Анди Исмаили во категорија соло изведби – машки, додека групата од 7 до 11 години освои трето место.

Со постигнатите резултати во сите три категории, малите танчери од Гостивар обезбедија пласман за Европското и Светското првенство по модерни танци.

„Презадоволни сме од организацијата и текот на Државниот натпревар, како и од нашите достигнувања. Резултатите покажуваат како напредуваме и растеме со секој натпревар и секој настап. Се надевам на успеси и во иднина“, рече Сарита Селмани, под чие водство работи ова денс студио.

Европското првенство ќе се одржи во декември годинава во Полска, додека Светското, во јуни следната година во Чешка.